Համաշխարհային դոմենային շուկան 2020-ականների երկրորդ կեսից զարգացման նոր փուլի շեմին է և տնտեսության թվայնացման արդյունքում աճի զգալի տեմպերի է հասել։ Դոմենային անունները վաղուց արդեն զուտ տեխնիկական գործիքներ չեն։ Դոմեններն արդեն վաղուց դիտարկվում և կիրառվում են որպես բիզնեսի, բրենդավորման, ազգային ինքնության և նույնիսկ աշխարհաքաղաքական ներկայության կարևոր բաղադրիչ։
Nominus ընկերության գլոբալ կանխատեսման համաձայն՝ 2024-ին աշխարհում գրանցված դոմենների թիվը կազմել է ավելի քան 364 միլիոն, իսկ մինչև 2030-ն այն կարող է հասնել շուրջ 460 միլիոնի։ Աճի հիմնական շարժիչ ուժերը թվային առևտրի ընդլայնումն են, փոքր և միջին բիզնեսների թվայնացումը, ինչպես նաև անհատական և կորպորատիվ բրենդների մրցակցությունը համացանցում։
Չնայած նոր տեխնոլոգիաների առաջխաղացմանը՝ վերին մակարդակի դոմենները (gTLD) 1990-ականնեց մինչև օրս շարունակում են պահպանել իրենց գերիշխող դիրքը։ Առաջատար է .com-ը, որով գրանցումների 55%-ն ԱՄՆ-ից է։ Կանխատեսվում է, որ մինչև 2030-ը gTLD-ով գրանցումների թիվը կհասնի 294 միլիոնի՝ ապահովելով 3.3% աճ։
Ըստ աղբյուրի, զուգահեռաբար ավելի զգալի է դառնում նաև երկրի կոդ հանդիսացող դոմենների՝ ccTLD-ների նշանակությունը, որոնց նույն ժամանակահատվածի համար կանխատեսելի աճը կազմելու է 3.4%։ Ներկայում ccTLD-ները ապահովում են դոմենային շուկայի 30-40%-ը։
ccTLD-ների կիրառությամբ Ասիա-խաղաղօվկիանոսյան տարածաշրջանի առաջատար Չինաստանը .cn դոմենային տիրույթում ներկայիս 21 միլիոն գրանցումների թիվը 2030-ին, ըստ կանխատեսումների, կհասցնի 33,1 միլիոնի, ինչը կկազմի համաշխարհային դոմենների շուկայի 7%-ը։
Ընդհանուր առմամբ, ներկայումս 115 միլիոն գրանցում ունեցող եվրոպական դոմենային շուկայի համար կանխատեսվող աճը կհասնի միայն 0.8%։ Եվրոպական տարածաշրջանում, որի մաս է նաև Հայասատանը, առաջատարը Գերմանիան է՝ .de դոմենային տիրույթում 17,717 միլիոն գրանցումներով, որոնց 70%-ն արված է հենց երկրի ներսից։
Այդուամենայնիվ, Մերձավոր Արևելքի և Աֆրիկայի զգալիորեն փոքր դոմենային շուկաները 2030-ին աճի տեմպերով շատ ավելի առաջատար դիրքում կլինեն մյուս բոլոր տարածաշրջանների համեմատությամբ։ Նրանք կրկնապատկեն 2023-ի ցուցանիշը, որը ողջ Աֆրիկա մայրցամաքի համար կազմում է 5,7 միլիոն գրանցված դոմեն։
Դոմենների գրանցման աճի առումով հետնապահը կլինի Հյուսիսային Ամերիկայի տարնծնշրջանը։ Միաժամանակ, կպահպանի առաջատար դիրքը հենց միայն Միացյալ Նահանգների դոմենային շուկայի հաշվին, որում ներկա դրությամբ արդեն իսկ կա 132 միլիոն գրանցված դոմեն։
