Տեսողական խնդիրներ ունեցող անձանց մեդիաինտեգրմանը և ժամանակակից մեդիա հմտությունների զարգացմանն ուղղված «Չտեսնված» փոդքասթ դասընթացը «Ինտերնետ հանրություն» ՀԿ-ի նոր նախաձեռնությունն է, որն իրականացվում է Հայաստանի կույրերի միավորման «Սոկրատ Շահնազարյանի անվան մշակույթի տան» հետ համագործակցությամբ։
Փետրվարի 11-ին մեկնարկած դասընթացում ներգրավված համայնքի 6 անդամ՝ տեսողական տարբեր խնդիրներ ունեցող անձինք մարտի վերջին կներկայացնեն իրենց առաջին փոդքաստները, որոնք պատրաստում են դասընթացավար Քրիստիան Գինոսյանի օգնությամբ։
«Տարիներ ի վեր, աշխատելով տեսողական խնդիրներ ունեցող անձանց հասարակական կյանք ինտեգրման ուղղությամբ, փորձում ենք նրանց համար ժամանակակից տեխնոլոգիական գործիքներից ինքնուրույն օգտվելու հնարավորություն ստեղծել։ Այս դասընթացը ոչ միայն մասնակիցների ներուժի դրսեվորման, այլև նրանց օգնությամբ կարևորագույն խնդիրների բարձրաձայնման և լուծումների հասնելու ուղի է»,- նշեց «Ինտերնետ հանրություն» ՀԿ-ի խորհրդի նախագահ Իգոր Մկրտումյանը։
Փոդքասթի դասընթացը շարունակությունն է այն նախաձեռնությունների, որոնք տարիներ շարունակ իրականացրել են «Ինտերնետ հանրություն» և «Ինտերնետ հասարակության Հայաստան հատված» ՀԿ-ները՝ միջազգային և տեղի գործընկերների հետ համագործակցությամբ։
Տեսողության խնդիրներ ունեցող անձանց կրթական և մասնագիտական հնարավորությունների ընդլայնմանն ուղղված կարևոր քայլերից էր 2016-ին ստեղծված «Մենք» ինտերնետային ռադիոն (radio-menq.am), որը «Ինտերնետ հանրություն» ՀԿ-ի նախաձեռնություններից է և իրականացվել է Հայաստանի Կույրերի միավորման աջակցությամբ՝ միջազգային Internet Society կազմակերպության ֆինանսավորմամբ։
Նախաձեռնության զարգացման հաջորդ կարևոր փուլը ձայնագրման ստուդիայի տեխնիկական վերազինումն էր՝ 2024-ին, «Ինտերնետ հասարակության Հայաստան հատված» ՀԿ-ի կողմից՝ International Telecommunication Union-ի աջակցությամբ։ Հայաստանի կույրերի միավորման «Սոկրատ Շահնազարյանի անվան մշակույթի տանը» գործող ստուդիան, որը տարիներ առաջ ստեղծված ինտերնետ կենտրոնի մաս է, որն այսօր հնարավորություն է տալիս ոչ միայն ստեղծել ժամանակակից աուդիոբովանդակություն, այլև սովորեցնել նոր մասնագիտություններ։
Փոդքասթի ստեղծման ընթացիկ դասընթացը ևս մեկ կարևոր քայլ է այս շարունակական աշխատանքի շրջանակում՝ ուղղված տեսողական խնդիրներ ունեցող անձանց թվային ներառմանը, նրանց ձայնը լսելի դարձնելուն և տեղեկատվական հասարակությունում լիարժեք ներկայության ապահովմանը։
