Իրանի առաջին կին պրոֆեսոր Ալենուշ Տերյանին, իրավամբ, կոչել են «Իրանի ժամանակակից աստղաֆիզիկայի մայր»։ Կյանքի 90 տարիների ողջ գիտակցական մասը նա օգտագործել է ինքնազարգացման և գիտության մեջ իր տեղն ունենալու համար։
Թեհրանում ծնված հայ աղջնակը՝ Ալենուշը, իր ձգտման շնորհիվ և ծնողների միջոցներով սովորել է Թեհրանի համալսարանի Գիտության, ապա Սորբոնի համալսարանի Մթնոլորտային ֆիզիկայի ֆակուլտետներում։ Իսկ Արևմտյան Գերմանիայի Արևային ֆիզիկայի աստղադիտարանում սովորել-աշխատելու կրթաթոշակը Թեհրանի համալսարանը շնորհել է հենց Ալենուշ Տերյանին։ Ու թեև նա և՛ Ֆրանսիայում, և՛ Գերմանիայում ապրել աշխատելու շահեկան առաջարկներ է ունեցել, բայց գերադասել է իր իմացությունները ծառայեցնել Իրանին։
Բանիմաց և գեղեցիկ տիկինը, սակայն, ընտանիք չի ձևավորել և առիթ է ունեցել ասելու. «դստերս անունն Արեգակ է, որդունս՝ Լուսին»։ Նա կյանքի վերջին տարիներն անցկացրել է ծերանոցում, իսկ տունը, տուրք տալով ծնողների հիշատակին, կտակել է Նոր Ջուղայի հայ համայնքին, որպեսզի այնտեղ կարողանան բնակվել կացարան չունեցող ուսանողները։
Ալենուշ Տերյանը Թեհրանի համալսարանում դասավանդել է թերմոդինամիկա, աստղաֆիզիկա։ Եղել է Թեհրանի համալսարանի Եկրաֆիզիկայի կոմիտեի անդամ, ապա նշանակվել նույն համալսարանի Երկրաֆիզիկայի հիմնարկի արևային ֆիզիկայի հետազոտությունների խմբի նախագահ և մեծ դեր կատարել արևային ֆիզիկայի աստղադիտարանի հիմնադրման ու զարգացման գործում։
Իրանաբնակ հայ գիտնականին իշխանությունները պատվել են նրա ողջության օրոք՝ արժանացնելով երկրի նախագահի գնահատագրի և շքանշանի։
Լուսանկարները՝ norjugha.ir կայքից
