Դոմենային անունների համակարգը (Domain Name System DNS) ստեղծողներն այն անվանակոչելու տարբերակը գտել են լատիներենում։
Կալվածքը ֆեոդալական դարաշրջանում լատիներեն կոչում էին dominium։ Հետագայում այս բառից ծագած domain-ը, ինտերնետում կիրառելիություն ստանալով, հայտնվեց համայն մարդկության լեզվապաշարում։ Արդեն տասնամյակներ կիրառվում է ոչ միայն ուղիղ՝ տիրույթ, այլեւ դոմենային տիրույթ, դոմենային անուն իմաստներով։
Ընդհանուր առմամբ, domain բառը փոխանցում է որոշակի տարածքի կամ վայրի տիրապետման, վերահսկման իմաստը՝ իրականում, թե համացանցում։ Այժմ յուրաքանչյուր դոմենի ներքո համացանցում պահվում է հատուկ եւ վերահսկվող մասնավոր տարածք։
Աշխարհում առաջին դոմենը՝ symbolics.com-ը գրանցվել է 1985-ի մարտին, պատկանել՝ Symbolics Inc. ամերիկյան տեխնոլոգիական ընկերությանը։ Հայաստանում առաջին դոմենային անունը գրանցելու հայտը ներկայացրել է Երեւանի ֆիզիկայի ինստիտուտը, արդյունքում գրանցվել է՝ yerphi.am-ը երկրի կոդ հանդիսացող .am-ի ստեղծման տարում՝ 1994-ի դեկտեմբերին։
Դոմենների մասին ավելի մանրամասն տեղեկություններ է ներկայացնում «Վիքիպեդիա» ազատ հանրագիտարանը, որում ՏՏ ոլորտին առնչվող հոդվածների քանակն ավելացել է 100-ով՝ «Ինտերնետ հանրություն» ՀԿ-ի ամենամյա «ՎիքիՀայ» արշավի ընթացքում։
