Հայաստանը միացել է թվային ինքնության ապակենտրոնացված շարժմանը՝ դառնալով աշխարհի երկրորդ երկիրը, որի կոդ հանդիսացող բարձր մակարդակի դոմենը՝ .am-ը (ccTLD), պաշտոնապես ինտեգրվում է բլոկչեյն տեխնոլոգիային։
Այսպիսով .am-ն ավարտել է իր «հայելային փոխակերպումը» դեպի բլոկչեյն՝ դառնալով երկրորդ աշխարհագրական դոմենը, որը միանում է Web3 միջավայրին։ Առաջինը նման անցում իրականացրած երկիրը Սամոան է՝ իր .ws դոմենային անունով։
Այս տեխնոլոգիական առաջընթացը հնարավորություն է տալիս .am դոմենը միացնել Web3 հարթակներին՝ առանց ավանդական DNS կարգավորումները փոփոխելու, պահպանելով նախկին կայքերի ամբողջական և անխափան աշխատանքը։ Այս կերպ, .am դոմենն այժմ կարող է աջակցել ապակենտրոնացված հնարավորություններին, ինչպիսիք են՝ NFT-ների կապում, թվային դրամապանակների ինտեգրում և վեբ 3.0 բրենդավորման գործառույթներ։
ArmeniaDomains-ը, GlobalR-ը և WebUnited-ը հանդիսանում են այս նախաձեռնության հիմնական խթանողները՝ համագործակցելով Web3 ենթակառուցվածքների մատակարարների հետ, ինչպիսիք են Freename-ը։
Web3 ինտեգրումը .am դոմենն ընդլայնում է իր աշխարհագրությունը՝ հնարավորություն ընձեռելով ունենալ բազմաշղթայական թվային մուտքեր։ Սա նոր հնարավորություններ է բացում բիզնեսների և անհատների համար՝ թվային ակտիվների ավելի ապահով և ճկուն կառավարման տեսանկյունից։
Նորարարական այս փոփոխությունը համընկնում է Web3-ի և բլոկչեյն-ի արագ աճին, ինչը նշանակում է, որ ավանդական դոմենային համակարգը մոտենում է իր կառուցվածքային վերափոխման փուլին։ Այդ համատեքստում առաջին ներդրող երկրները՝ Հայաստանը և Սամոան, կարող են ստանձնել առաջատար դեր ինտերնետի ապակենտրոնացված ապագայի ստեղծման ու զարգացման գործում։
