Դոմենների կառավարման, սպասարկման եւ դրանց անվտանգության ապահովման վերաբերյալ հարցեր են
քննարկվել Ասիա-Խաղաղօվկիանոսյան տարածաշրջանի վերին մակարդակի դոմենային անունների ռեգիստրների
ասոցիացիայի (Asia Pacific Top Level Domain Association` APTLD) այս տարվա համաժողովներին։
APTLD87-ն անցկացվել է փետրվարի 10-13-ը Չինաստանի Հոնկոգ քաղաքում։ Հայաստանն այնտեղ
ներկայացրել է «Ինտերնետ հանրություն» ՀԿ պատվիրակությունը։
Համաժողովում, մասնավորապես, քննարկվել են հետեւյալ թեմաները՝
- DNS եւ DNSSEC կառավարման լավագույն փորձը, միտումներն ու հեռանկարները,
- DNS-ների անվտանգ էկոհամակարգի ստեղծման պարզեցված միջոցները եւ KINDNS ուղեցույցը,
- ISO 27001 ստանդարտի ներդրման միջոցով ccTLD-ների եւ գործընկեր կազմակերպությունների անվտանգության կառավարման բարելավումը եւ այլն։
«Այս համաժողովները լավ հնարավորություն են ներկայացնելու սեփական փորձը եւ տեղեկանալու միջազգային ու տարածաշրջանային տեխնոլոգիական, վարչական, օրենսդրական, ինչպես նաեւ անվտանգային նորույթներին»,- նշեց ԻՀ ՀԿ պատվիրակության անդամ, կազմակերպության խորհրդի անդամ Վեսմիրա Հարությունյանը։ Վերջինս համաժողովում ներկայացրել է հայկական դոմենների՝ .am եւ .հայ-ի կառավարման սկզբունքները, որոնք մասնագիտական թիմը մշակել եւ հղկել է անցած 30 տարիների ընթացքում, նշել, թե ինչ քայլեր են ձեռնարկվում ոլորտը զարգացնելու եւ ավելի անվտանգ դարձնելու համար մեր երկրում։
APTLD-ն հիմնադրվել է 1998-ին։ Նպատակն է աջակցել ccTLD-ների կայուն զարգացմանը, խթանել տարածաշրջանային համագործակցությունը, զարգացնել մասնագիտական հանրույթի կարողությունները եւ պաշտպանել անդամների շահերը։ Կազմակերպության 2025-2027-ի ռազմավարական պլանով նախատեսվում է համատեղ նախագծերի խթանում, միջազգային համաժողովներին ակտիվ մասնակցություն, դոմենների գրանցման ու տվյալների գաղտնիության մոդելային ընթացակարգերի եւ քաղաքականությունների մշակում, դոմենային անունների անվտանգության եւ կիբեռանվտանգության զարգացում, ինչպես նաեւ հաջողված փորձի տարածում։
